கிந்தொட்ட பிரதேசத்தில் நேற்றிரவு(17) இடம்பெற்ற கலவரம் தொடர்பில் இதுவரை 19 பேர் கைது செய்யப்பட்டுள்ளதாக பொலிஸார் தெரிவித்துள்ளனர்.

தற்பொழுது நிலைமை சீராகவுள்ளதாகவும் இன்று காலை 9.00 மணிக்கு ஊரடங்கு தளர்த்தப்படவுள்ளதாகவும் பொலிஸார் அறிவித்துள்ளனர்.

நேற்றிரவு இடம்பெற்ற பதற்ற நிலைமையின் போது பள்ளிவாயல், வீடுகள், வியாபார நிலையங்கள் என்பன தீ வைக்கப்பட்டும், கல்வீச்சுத் தாக்குதலுக்கு உள்ளாகியும் இருந்தன.

பொலிஸார் குவிக்கப்பட்ட போதும் நிலைமையைக் கட்டுப்படுத்த முடியாமல் போனதனால் அப்பகுதியில் ஊரடங்கு அமுல்படுத்தப்பட்டிருந்தமை குறிப்பிடத்தக்கது.

சர்வதேச ரீதியிலான கணித ஒலிம்பியாட் போட்டிக்காக யுத்தத்தால் பாதிக்கப்பட்ட, வடக்கு மாகாணத்தில் இருந்து கிளிநொச்சி மகா வித்தியாலய மாணவன் ஒருவர் தெரிவுசெய்யப்பட்டுள்ளார்.

இலங்கையில் இருந்து ஒலிம்பியாட் போட்டிக்காக தெரிவாகியுள்ள 6 மாணவர்களில் ஒரேயொரு தமிழ் மாணவன் என்ற பெருமையை தெய்வேந்திரம் திருக்குமார் தனதாக்கிக் கொண்டுள்ளார்.

இதேவேளை சர்வதேச அளவிலான இந்த போட்டி எதிர்வரும் 20 ஆம் திகதி சிங்கப்பூரில் நடைபெறவுள்ளமை குறிப்பிடத்தக்கது.

கிளிநொச்சி புறநகர்ப் பகுதியில் உள்ள பாடசாலை ஒன்றில் கடமையாற்றும் ஆசிரியர் தன்னைக் காதலிக்க மறுத்த மாணவியை கடுமையாகத் தாக்கிய சம்பவம் இடம்பெற்றுள்ளது.

குறித்த உயர்தரப் பாடசாலையில் தன்னிடம் கற்கும் மாணவிக்கு தொடர்ந்து காதல் தொல்லை கொடுத்து வந்துள்ளார்.

அதற்கு மாணவி மறுப்புத் தெரிவித்து வந்ததால் கடந்த வெள்ளிக்கிழமை மாணவி தனியே வீதியால் செல்லும் போது வழி மறித்துள்ளார்.

அப்போதும் தனது காதலை ஆசிரியர் குறித்த மாணவிக்கு தெரியப்படுத்திய போது மாணவி அதுக்கும் மறுப்புத் தெரிவித்துள்ளார்.

இதனால் கடும் கோபமடைந்த ஆசிரியர் மாணவியைத் தாக்கியதாகத் தெரியவருகின்றது. மாணவி இது தொடர்பாக தனது பெற்றோருக்கு தெரியப்படுத்திய போது குறித்த விடயம் சம்மந்தப்பட்டவர்களின் கவனத்துக்கு கொண்டு வரப்பட்டது.

இதனையடுத்து கடந்த திங்கட்கிழமை விசாரணை மேற்கொண்ட கல்விப்பணிமனை குறித்த ஆசிரியரை வேலை இடை நீக்கம் செய்து விசாரணைகளைத் தொடர்கின்றது.

குறித்த ஆசிரியர் தொண்டராசிரியராகக் கடமையாற்றியே பதவிக்கு வந்தவர் என்பதும் குறிப்பிடத்தக்கது.

 

மட்டக்களப்பில் முறையற்ற செயற்பாடுகளில் ஈடுபட்ட 7 பேரையும் 7 நாட்கள் விளக்கமறியலில் வைக்குமாறு மட்டக்களப்பு நீதிமன்றம் உத்தரவிட்டுள்ளது.

சம்பவம் தொடர்பாக தெரியவருவதாவது,

மட்டக்களப்பு நகர் பகுதியில் உள்ள பிரபல ஆண்கள பாடசாலையில் கல்வி பயிலும் இளைஞர் ஒருவர், வாழைச்சேனையில் கல்வி பயின்று மேற்படிப்பிற்காக மட்டக்களப்பில் வீடு ஒன்றை வாடகைக்கு எடுத்து, தனது கல்வியை தொடர்ந்துள்ளார்.

இந்த நிலையில் அவர் தனது நண்பர்களுடன் சேர்ந்து முறையற்ற செயற்பாடுகளில் ஈடுபட்டு வந்த சம்பவங்களை அவதானித்த கிராமசேவகர் பொலிஸாருக்கு தகவல் வழங்கியுள்ளார்.

இதையடுத்து உடனடியாக சம்பவ இடத்துக்கு சென்ற பொலிஸார் 7 போரையும் கைது செய்து விசாரணைகளை நடத்தியுள்ளனர்.

இதில், காத்தான்குடி கணிப ஹாஜியார் ஒழுங்கை, கிரின் வீதி காத்தான்குடி எனும் விலாசத்தில் வசித்து வந்த 3 பிள்ளைகளின் தாயுடன் மட்டக்களப்பு வெயிலி வீதியில் உள்ள ஒருவர் காதல் கொண்டுள்ளதாக தெரியவந்துள்ளது.

இதன் காரணமாகவே குறித்த வீட்டுக்கு அப்பெண் வந்துள்ளார், இந்த சுற்றிவளைப்பில் குறித்த பெண்ணும் கைது செய்யப்பட்டுள்ளார்.

சம்பவம் நடந்த வீட்டை சுற்றிவளைத்த போது ஆண் உறைகள், கஞ்சா உள்ளிட்ட பொருட்களையும் மீட்டுள்ளனர்.

வாடகைக்கு வீடு எடுத்த சந்தேகநபருக்கு வெளிநாட்டில் இருந்து பணம் வருவதாகவும், அவரின் தாயார் வாழைச்சேனை பாடசாலை ஒன்றில் ஆசிரியராக கடமையாற்றி வருகின்றார்.

குறித்த சந்தேகநபருக்கு கஞ்சா வைத்திருந்த காரணத்தால் 10,000 ரூபா அபராதமும் 7 நாள் விளக்கமறியலும், மற்றைய ஆறு பேரையும் விளக்கமறியலில் வைக்க உத்தரவு பிறப்பிக்கப்பட்டுள்ளது.

தாண்டவெளி, பாரதி வீதி இரண்டாம் குறுக்குத் தெருவில் உள்ள வீடு ஒன்றில் இளைஞர் குழுக்களின் அட்டகாசம் தொடர்ச்சியாக இடம்பெற்றுவந்த நிலையில் அது தொடர்பான தகவல்கள் மட்டக்களப்பு பொலிஸாருக்கு வழங்கப்பட்டுள்ளது.

குறித்த வீட்டில் இது போன்ற முறையற்ற சம்பவங்கள் பல இடம் பெற்றுள்ளதாக அறிய முடிகின்றது. குறித்த மாணவர்கள் தொடர்பான தகவல்களை வெளியாகக்கூடிய சாத்தியக்கூறுகள் காணப்படுவதாகவும் தெரிவிக்கப்படுகின்றது.

கைது செய்யப்பட்ட இளைஞர்கள் அனைவரும் உயர்தரம் கற்று வருபவர்கள் எனவும் அவர்கள் குறித்த வீட்டில் கஞ்சா, சிகரட்டுகள் போன்ற போதைப்பொருட்களும் பாவித்து வந்துள்ளனர் எனவும் பொலிஸார் தெரிவித்துள்ளனர்.

சம்பவத்தில் கைது செய்யப்பட்ட 27 வயதுடைய பெண் காத்தான் குடியை சேர்ந்தவர் எனவும் மட்டக்களப்பு பொலிஸார் தெரிவித்தனர்.

மட்டக்களப்பில் கல்வி கற்பதற்காக வீடு ஒன்றை வாடகைக்கு பெற்று குறித்த பெண் தனது மகனை கல்வி கற்பதற்கான ஏற்பாடுகளை செய்துள்ள நிலையில் தனது நண்பர்களை இணைத்துக்கொண்டு இவ்வாறான செயற்பாடுகளை மேற்கொண்டு வந்துள்ளதாகவும் மட்டக்களப்பு பொலிஸார் தெரிவித்தனர்.

கைது செய்யப்பட்டவர்கள் தொடர்பான விசாரணைகள் தொடர்ந்து மேற்கொள்ளப்பட்டு வருவதாக மட்டக்களப்பு பொலிஸார் தெரிவித்தனர்.

இதேவேளை கடந்த காலங்களில் பெரும் வறுமைக்கு மத்தியிலும் மாணவர்கள் படித்து உயர் நிலையை அடைந்த நிலையில், தற்போது செல்வம் காரணமாக மாணவர்களின் வாழ்வு சீரழிவதை அவதானிக்கக்கூடியதாக உள்ளது.

குறித்த மாணவரின் பெற்றோர் செல்வந்த நிலையில் இருப்பதால், சம்பவம் தொடர்பில் பொலிஸாருக்கு தகவல் கொடுத்த கிராம சேவகருக்கு அச்சுறுத்தல் ஏற்பட வாய்ப்புள்ளதாகவும் மட்டக்களப்பு செய்திகள் தெரிவிக்கின்றன.

அரசாங்கத்தின் அனைத்து நாடாளுமன்ற உறுப்பினர்கள் மற்றும் அரச பணியாளர்களின் அனைத்து தொலைபேசி கலந்துரையாடல்களும் பதிவு செய்யப்படுவதாக நாடாளுமன்ற உறுப்பினர் மஹிந்த ராஜபக்ச தெரிவித்துள்ளார்.

சிறையடைக்கப்பட்டுள்ள ஜனாதிபதி செயற்குழு பிரதானி காமினி சேனரத்தை வெலக்கடை சிறைச்சாலைக்கு சந்தித்ததன் பின்னர் அவர் இதனை குறிப்பிட்டார்.

குற்றம் செய்தவர்கள் தண்டிக்கப்பட வேண்டும்.

இவ்வாளவு காலமும் ஒன்றிணைந்த எதிர்கட்சியை சார்ந்தவர்களின் தொலைப்பேசி முலமான தொடர்புகள் மாத்திரமே கண்காணிக்கப்பட்டு வருவதாக தெரியவந்திருந்தது.

இந்த நிலையில், தற்போது அரசாங்கத்தை சார்ந்தவர்களினதும் அரச பணியாளர்களினதும் வியாபாரிகளினதும் தொலைபேசி தொடர்புகளை இரகசியமாக கண்கானிக்கப்படுகின்றமை தெரியவந்துள்ளதாக மகிந்த ராஜபக்ஷ தெரிவித்துள்ளார்.

காணாமல் போனவர்களின் குடும்ப உறுப்பினர்களுடைய முறைப்பாடுகள், கோரிக்கைகள் மற்றும் தகவல்களை பெற்றுக் கொள்வதற்காக மாவட்ட செயலாளர்களூடாக புதிய விண்ணப்பத்தை சமர்பிப்பதற்கு தீர்மானிக்கப்பட்டுள்ளது.

ஜனாதிபதி மைத்திரிபால சிறிசேனவினால் டிசம்பர் 15ம் திகதிக்கு முன்னர் அந்த தகவல்களை திரட்டுமாறு அனைத்து மாவட்ட செயலாளர்களுக்கும் சுற்றரிக்கை அனுப்புமாறு ஆலோசனை வழங்கப்பட்டுள்ளதாக ஜனாதிபதி ஊடகப் பிரிவு கூறியுள்ளது.

குறித்த தகவல்கள் காணாமல் போனவர்களின் அலுவலகம் மற்றும் காணாமல் போனவர்களின் ஆணைக்குழு ஊடாக மீண்டும் விசாரணை செய்வதற்கு ஜனாதிபதி ஆலோசனை வழங்கியுள்ளார்.

காணாமல் போனவர்களின் குடும்ப உறுப்பினர்கள் சிலர் நேற்று பிற்பகல் ஜனாதிபதி அலுவலகத்தில் வைத்து ஜனாதிபதி மைத்திரிபால சிறிசேனவை சந்தித்துள்ளனர்.

தற்போதைய அரசாங்கம் எந்தவொரு இரகசிய முகாம்களையும் நடத்தவில்லை என்றும், எந்தவொரு நபரையும் இரகசியமான முறையில் தடுத்து வைக்கவில்லை என்றும் ஜனாதிபதி கூறியுள்ளார்.

நாட்டின் அனைத்து மக்களினதும் பிரச்சினைகள் சம்பந்தமாக திறந்த மற்றும் நியாயமான தீர்வு வழங்குவதற்கு தான் உள்ளிட்ட அரசாங்கம் அரப்பணிப்புடன் இருப்பதாக இதன்போது ஜனாதிபதி மைத்திரிபால சிறிசேன கூறியுள்ளார்.

ஐக்கிய மக்கள் சுதந்திரக் கூட்டமைப்பின் பாராளுமன்ற உறுப்பினர் நாமல் ராஜபக்ஸ எவ்வாறு சட்டத்தரணியானார் என சர்வதேச வர்த்தக ராஜாங்க அமைச்சர் சுஜீவ சேனசிங்க கேள்வி எழுப்பியுள்ளார்.

வரவு செலவுத்திட்டம் தொடர்பில் நேற்றைய தினம் பாராளுமன்றில் நடைபெற்ற விவாதத்தில் பங்கேற்ற போது அவர் இதனைக் குறிப்பிட்டுள்ளார்.

நமால் ராஜபக்ஸ நேர்மையான முறையில் சட்டக்கல்லூரி பரீட்சையில் சித்தியடையவில்லை என அவர் குற்றம் சுமத்தியுள்ளார்.

குளிரூட்டப்பட்ட அறை ஒன்றில் இருந்து நாமல் ராஜபக்ஸ சொகுசாக பரீட்சைக்குத் தோற்றியதாகவும் பரீட்சையில் பல்வேறு மோசடிகள் இடம்பெற்றுள்ளதாகவும் அவர் குறிப்பிட்டுள்ளார்.

சட்டத்தரணி என்ற போதிலும் எந்தவொரு சட்டமும் நாமல் ராஜபக்சவிற்கு தெரியாது என அவர் சுட்டிக்காட்டிக்காட்டியுள்ளார்.

சிவில் வழக்கு சரத்துக்களில் ஏதேனும் இரண்டு சரத்துக்களை முடிந்தால் நாமல் ராஜபக்ஸ தற்போது பாராளுமன்றில் கூறட்டும் என அவர் சவால் விடுத்துள்ளார். கிறிஸ் நிறுவனத்தின் ஊடாக 400 மில்லியன் ரூபா கொள்ளையிட்டதாகவும் நாமல் மீது குற்றம் சுமத்தியுள்ளார்.

சித்தப்பமார், மாமார், தந்தை மற்றும் சகோதரர்களுடன் இணைந்து பாரியளவில் பணத்தை கொள்ளையிட்டுள்ளதாகக் குற்றம் சுமத்மதியுள்ளார்.

இவ்வாறு வெட்கம் கெட்ட பிழைப்பு நடாத்துவதற்கு பதிலாக, தோளில் போட்டிருக்கும் சிகப்பு துண்டைக் கொண்டு தூக்கிட்டு சாவது மேல் என சுஜீவ சேனசிங்க கடுமையாக விமர்சனம் செய்துள்ளார்.

ஒன்றாக விளையாடிய வசீம் தாஜூடீனையும் கொலை செய்தாகத் தெரிவித்துள்ளார். இதேவேளை, பேர்பச்சுவல் ட்ரஸரீஸ் நிறுவனத்தின் உரிமையாளர் அர்ஜூன் அலோசியஸூடன் சுஜீவ சேனசிங்க தொடர்பு பேணியதாகவும் இருவரும் 44 தடவைகள் தொலைபேசியில் உரையாடியுள்ளதாகவும் நாமல் ராஜபக்ஸ குற்றம் சுமத்தியுள்ளார்.

காணாமல் ஆக்கப்பட்டவர்கள் தொடர்பில் ஜனாதிபதி மைத்திரிபால சிறிசேனவிடமிருந்து ஆக்கபூர்வமான பதில் எதுவும் கிடைக்கவில்லை என காணாமல் ஆக்கப்பட்டோரது உறவினர் ஒருவர் குறிப்பிட்டார்.

தமிழர் தாயகத்தில் காணாமல் ஆக்கப்பட்டவர்களின் உறவினர்கள், நேற்று (வியாழக்கிழமை) ஜனாதிபதியை சந்தித்திருந்த நிலையில் அது தொடர்பில் கருத்து தெரிவிக்கையிலேயே இவ்வாறு குறிப்பிட்டுள்ளார்.

அங்கு தொடர்ந்து தெரிவித்த அவர், ”கடந்த ஆட்சிக் காலத்தில் இழைக்கப்பட்ட குற்றங்களுக்கு, தீர்வை பெற்றுக்கொடுக்கும் பாரிய பொறுப்பு இந்த நல்லாட்சி ஒப்படைக்கப்பட்டுள்ளது.

ஆனால், காணாமல் ஆக்கப்பட்டோர் விடயத்தில் ஜனாதிபதி பொறுப்பற்று செயற்படுவதாகவே தோன்றுகின்றது.

எமது உறவுகளை மீட்டுத்தருவதில் இந்த அரசாங்கம் கவனம் செலுத்துவதாகத் தெரியவில்லை.

மாறாக இழப்பீட்டை வழங்கி எமது வாய்களை அடைப்பதற்கான முயற்சிகளே முன்னெடுக்கப்பட்டு வருகின்றன.

எமது உயிர்களின் மதிப்பும், எமது கவலைகளும் ஏன் இந்த அரசியல்வாதிகளுக்கும், சர்வதேச சமூகத்திற்கு தெரியவில்லை” என்றும் கேள்வி எழுப்பியுள்ளனர்.

காலி, கிந்தொட்ட பகுதியில் இடம்பெற்ற சிறு சம்பவம் கலவரம் வரையில் வியாபித்தமைக்கு அரசாங்கத்தின் சார்பில் தனது ஆழ்ந்த கவலையைத் தெரிவித்துக் கொள்வதாக உள்நாட்டலுவல்கள் அமைச்சரும் காலி மாவட்ட ஐக்கிய தேசியக் கட்சியின் தலைவருமான வஜிர அபேவர்தன தெரிவித்துள்ளார்.

அப்பிரதேசத்தில் நிலைமையைக் கட்டுப்பாட்டில் கொண்டுவருவதற்காக விசேட பொலிஸ் படையணிகள் குவிக்கப்பட்டுள்ளதுடன், விசேட பொலிஸ் அதிரடிப்படையினர் ஈடுபடுத்தப்பட்டுள்ளதாகவும் அவர் வெளியிட்டுள்ள ஊடக அறிக்கையில் கூறியுள்ளார்.

இலங்கை அரசாங்கத்தின் சார்பில் தேவையான அனைத்து நடவடிக்கைகளையும் முன்னெடுக்கப் போவதாகவும் அவர் மேலும் கூறியுள்ளார்.

வடக்கு கிழக்கு இணைப்பு தொடர்பில், அரசியலமைப்பு வழிநடத்தல் குழுவின் இடைக்கால அறிக்கையில் தாம் யோசனை முன்வைக்கவில்லை என  முஸ்லிம் காங்கிரஸின் தலைவரான அமைச்சர் ரவூப் ஹக்கீம் தெரிவித்துள்ளார்.

கண்டியில்  இடம்பெற்ற நிகழ்வொன்றில் கலந்துகொண்டு கருத்து வெளியிட்டபோதே அவர் இதனைத் தெரிவித்துள்ளார்.

அரசிலமைப்பை உருவாக்கும்போது, இணக்காப்பாட்டுக்கு வரமுடியாத இடங்களில் மாற்று யோசனைகளை தாம் முன்வைத்துள்ளதாக அவர் கூறியுள்ளார்.

வடக்கு, கிழக்கு இணைப்பு என்பது தமிழ்த் தேசியக் கூட்டமைப்பால் நீண்டகாலமாக முன்வைக்கப்பட்டுவரும் கோரிக்கையாகும்.

அது மாற்று யோசனையாக இங்கு குறிப்பிடப்பட்டுள்ளது.

அவ்வாறனதொன்று நடப்பதற்கு தமக்குள்ள வாய்ப்பு மிகவும் குறைவானது என அமைச்சர் ரவூப் ஹக்கீம் தெரிவித்துள்ளார்.

தற்போதைய ஒதுக்கங்கள் மாற்றப்பட வேண்டும் என்று எதிர்பார்க்கவில்லை.

ஒன்பது மாகாணங்களுக்கு உள்ளேயே இலங்கை பிரிக்கப்பட வேண்டும் என தமது யோசனையில் குறிப்பிடப்பட்டுள்ளதாக அவர் குறிப்பிட்டுள்ளார்.

இதனூடாக இணைப்பு என்ற விடயம் குறித்து தாம் பேசவில்லை என்பதே அதில் அர்த்தப்படுவதாக அமைச்சர் ரவூப் ஹக்கீம் தெரிவித்துள்ளார்.